ప్రస్తుతం బార్ & రెస్టారెంట్ వ్యాపారంపై ఇప్పటికే అనేక రకాల ఆర్థిక భారాలు ఉన్నాయి. ఈ పరిస్థితుల్లో కొత్తగా ప్రివిలేజ్ ట్యాక్స్ విధించడం వల్ల బార్ యజమానులపై మరింత ఆర్థిక భారం పడుతుంది. ఈ భారాన్ని కస్టమర్లపై మోపాల్సిన పరిస్థితి ఏర్పడితే, కస్టమర్లు కూడా తీవ్ర ఇబ్బందులకు గురయ్యే అవకాశం ఉంది.
దీని వల్ల చట్టబద్ధంగా లైసెన్సులు తీసుకుని నిబంధనల ప్రకారం నిర్వహిస్తున్న బార్ & రెస్టారెంట్లు మరింత నష్టపోయే పరిస్థితి ఏర్పడుతుంది. అదే సమయంలో అక్రమంగా నిర్వహిస్తున్న పర్మిట్ రూమ్‌లు, బెల్ట్ షాపులు పెరిగే అవకాశం ఉంది.
ప్రధాన డిమాండ్లు:
1. ప్రివిలేజ్ ట్యాక్స్‌ను వెంటనే రద్దు చేయాలి.
బార్ & రెస్టారెంట్ యజమానులపై కొత్తగా విధిస్తున్న ఈ అదనపు భారాన్ని ప్రభుత్వం వెంటనే ఉపసంహరించుకోవాలి.
2. పర్మిట్ రూమ్‌లను ప్రభుత్వ నిబంధనల ప్రకారం కఠినంగా నియంత్రించాలి.
ప్రభుత్వ నిబంధనల ప్రకారం పర్మిట్ రూమ్ 100 చదరపు మీటర్ల పరిధిలోపల మాత్రమే ఉండాలి. అయితే ప్రస్తుతం కొన్ని వైన్ షాపుల వద్ద 500 చదరపు మీటర్లు, 1,000 చదరపు మీటర్లు, 2,000 చదరపు మీటర్లు, ఇంకా ఎకరం విస్తీర్ణంలో కూడా పర్మిట్ రూమ్‌ల మాదిరిగా కార్యకలాపాలు కొనసాగుతున్నాయి. ఇలాంటి నిబంధనలకు విరుద్ధమైన కార్యకలాపాలను అధికారులు వెంటనే గుర్తించి నియంత్రించాలి.
3. బార్‌లు ఉన్న ప్రాంతాల్లో బెల్ట్ షాపులను పూర్తిగా మూసివేయాలి.
ఎక్కడైతే చట్టబద్ధమైన బార్ & రెస్టారెంట్లు ఉన్నాయో, అదే ప్రాంతాల్లో బెల్ట్ షాపులు నిర్వహించడం వల్ల లైసెన్స్ తీసుకుని ప్రభుత్వానికి పన్నులు చెల్లిస్తూ వ్యాపారం చేస్తున్న బార్ యజమానులు తీవ్రంగా నష్టపోతున్నారు. కాబట్టి బార్‌లు ఉన్న ప్రాంతాల్లో బెల్ట్ షాపులకు ఎలాంటి అవకాశం లేకుండా ప్రభుత్వం కఠిన చర్యలు తీసుకోవాలి.
4. చట్టబద్ధమైన బార్ & రెస్టారెంట్లను రక్షించాలి.
ప్రభుత్వానికి అన్ని రకాల పన్నులు, లైసెన్స్ ఫీజులు చెల్లిస్తూ నిబంధనల ప్రకారం వ్యాపారం చేస్తున్న బార్ & రెస్టారెంట్ యజమానుల ప్రయోజనాలను ప్రభుత్వం కాపాడాలి. ఒకవైపు బార్‌లపై భారాలు పెంచుతూ, మరోవైపు అక్రమ పర్మిట్ రూమ్‌లు మరియు బెల్ట్ షాపులను అనుమతించడం వల్ల చట్టబద్ధమైన వ్యాపార వ్యవస్థ దెబ్బతింటుంది.
కాబట్టి ప్రభుత్వం మా సమస్యలను సానుకూలంగా పరిశీలించి, ప్రివిలేజ్ ట్యాక్స్‌ను రద్దు చేయడంతో పాటు, నిబంధనలకు విరుద్ధంగా కొనసాగుతున్న పర్మిట్ రూమ్‌లను నియంత్రించి, బార్‌లు ఉన్న ప్రాంతాల్లో బెల్ట్ షాపులను మూసివేయాలని తెలంగాణ రాష్ట్ర బార్ & రెస్టారెంట్ యజమానుల తరఫున డిమాండ్ చేస్తున్నాము.
తెలంగాణ రాష్ట్ర బార్ & రెస్టారెంట్ యజమానుల సంఘం
